که ستا پۀ سترګو کښې دَ حُسن دَ ځوانۍ نشه ده
زما پۀ زړۀ کښې هم دَ مينې دَ مستۍ نشه ده

څۀ زما مينه پُښتنه دَ چا غرور نۀ منې
څۀ مې پۀ سترګو کښې ساقي ستا دَ يارۍ نشه ده

څۀ ستا دَ زُلفو دَ بوئي څۀ زما دَ وينو دَ رنګ
پۀ هر يو ګُل خوره دَ نوې زندګۍ نشه ده

پۀ دې خيالونو کښې نوې سپرلي خوب دېره دے
پۀ دې سرونو کښې دَ ژوند دَ ازادۍ نشه ده

چې دَ صابر دَ جنون هم اخلي خراج دَ حسن
ستا پۀ هوښيار نظر کښې څومره لېونۍ نشه ده