دَ درد پۀ دار مې دَ کاکل خبرې هېرې نۀ دي
ما نه پۀ غم کښې دَ غزل خبرې هېرې نۀ دي

خور شوے ذهن مې راغونډ نۀ شو پۀ هېڅ خبره
چې مې دَ هغه خور اوربل خبرې هېرې نۀ دي

پۀ هر تکل بېخوده هره اندېښنه مې خوب شي
زما دَ سر ستا دَ څنګل خبرې هېرې نۀ دي

څۀ که زما ويران نظر ئې حېراني ذياته کړه
دَ هغه سترګو دَ توکل خبرې هېرې نۀ دي

بيا مې پۀ بل قسم پۀ بله وعده مۀ تېر باسه 
ما نه ړومبۍ وعده اول خبرې هېرې نۀ دي

خلقو دَ زمکې څۀ دستور و اقتدار وخيستو
پُښتنو ستا سو دَ ازل خبرې هېرې نۀ دي

يارانو هغسې صابر يم دَ اخلاص او وفا
لا خو مې ستاسو ډَ محفل خبرې هېرې نۀ دي